အိန္ဒိယနိုင်ငံ၊ ကူးသန်းရောင်းဝယ်ရေးနှင့်စက်မှုဝန်ကြီးဌာနက ပို့ကုန်မြှင့်တင်ရေးအဖွဲ့အစည်းများနှင့်ပူးပေါင်း၍ နယူးဒေလီမြို့ရှိ ပြပွဲများ ကျင်းပပြုလုပ်ရာ အဆောက်အအုံဖြစ်သည့် Bharat Madapam, Pragati Maidan တွင် ၂၀၂၅ ခုနှစ်၊ စက်တင်ဘာလ ၄ ရက်နေ့မှ ၆ ရက်နေ့အထိ AYUSH UTSAW ပြပွဲ ကျင်းပမည်ဖြစ်ကြောင်း သိရှိရသည်။ အဆိုပါပြပွဲအတွက် အောက်ပါတို့ကို ဖော်ပြထားပါသည်-
၁။    AYUSH UTSAV 2025 ပြပွဲကို ဘာရတ်နိုင်ငံတကာ ကျန်းမာရေးကုန်စည်ပြပွဲ (Bharat Health Global Expo 2025) နှင့်အတူ ကျင်းပပြုလုပ်ခြင်းဖြစ်ကြောင်း၊
၂။    ပြပွဲတွင် ကျန်းမာရေးဆိုင်ရာ ဖြေရှင်းနည်းများကို တစ်စုတစ်စည်းတည်း ပြသနိုင်ရန် ကြိုးပမ်း ထားပြီး iPHEX, India MedTech, Ayush Utsav, Phama Mach Tech, Lab Next Expo, Sanjeevani, Neutraverse စသည့် ကုန်စည်ပြပွဲများလည်း ပါဝင်မည်ဖြစ်ကြောင်းနှင့် ဆွေးနွေးပွဲ ဖိုရမ်များ၊ ရောင်းသူ၊ ဝယ်သူ တွေ့ဆုံပွဲများ၊ G2G နှင့် G2B တွေ့ဆုံပွဲများလည်း ပါဝင်မည် ဖြစ်ကြောင်း၊
၃။    တိုင်းရင်းဆေးပြပွဲဖြစ်သည့် AYUSH UTSAV  သည် တိုင်းရင်းဆေးနှင့် ဆေးဖက်ဝင်အပင်နှင့်ဆိုင်သော ကျန်းမာရေးကဏ္ဍတို့အတွက် နိုင်ငံတကာစီးပွားရေး ချိတ်ဆက်ဆောင်ရွက်ရန် အထင်ကရ အခမ်းအနားတစ်ခုဖြစ်ကြောင်း၊
၄။    ပြပွဲသို့ပါဝင်တက်ရောက်မည့်သူများသည် ၂၀၂၅ ခုနှစ်၊ ဇူလိုင်လ ၁၀ ရက်နေ့ နောက်ဆုံးထား၍ အမည်စာရင်း အဆိုပြုပေးပို့ရမည်ဖြစ်ကြောင်း၊ အဆိုပြုထားသည့် ကိုယ်စား လှယ်များအတွက် လေယာဉ်လက်မှတ်ခ ရိုးရိုးတန်း (Economy Class) အတွက် ထောက်ပံ့ငွေ အမေရိကန်ဒေါ်လာ ၄၀၀/- ပြန်လည်ထုတ်ပေးသွားမည်ဖြစ်ကြောင်း၊ ယင်းထောက်ပံ့မှုသည် ကုမ္ပဏီတစ်ခုလျှင် တစ်ဦးအတွက်သာဖြစ်ကြောင်း၊
၅။    စက်တင်ဘာလ ၃ ရက်နေ့မှ ၅ ရက်နေ့အထိ တည်းခိုနေထိုင်ရေးနှင့် အိန္ဒိယမှ ဆေးပစ္စည်းတင်ပို့သူ စီးပွားရေးလုပ်ငန်းရှင်များနှင့် တွေ့ဆုံဆွေးနွေးပွဲများနှင့် သီးသန့်ဆွေးနွေးပွဲများ တက်ရောက်ခွင့်ကိုလည်း ရရှိမည်ဖြစ်ကြောင်း၊
၆။    လေယာဉ်လက်မှတ်ခအတွက် ထောက်ပံ့ငွေထုတ်ပေးခြင်းများကို AYUSH Utsav ပြပွဲသို့ တက်ရောက်ခွင့် အရည်အချင်းပြည့်မှီသူများ အတည်ပြုချက် ထုတ်ပြန်မည့် နောက်ဆုံးနေ့ဖြစ်သည့် စက်တင်ဘာလ ၆ ရက်နေ့တွင် ဆောင်ရွက်ပေးမည်ဖြစ်ကြောင်းနှင့် ဝယ်ယူသူအဆိုပြုလွှာဆိုင်ရာ အသေးစိတ်အချက်အလက်များကို Registration Form  တွင် ကြည့်ရှုနိုင်ပါကြောင်း၊
AYUSH UTSAV 2025 ပြပွဲသို့ ပါဝင်ပြသလိုသည့် မြန်မာစီးပွားရေးလုပ်ငန်းရှင်များအနေဖြင့် မြန်မာကုန်သွယ်မှုမြှင့်တင်ရေးအဖွဲ့၊ ကုန်သွယ်မှုဖွံ့ဖြိုးရေးဌာနခွဲ၊ ဖုန်း-၀၆၇-၄၀၈၆၂၃၊ email: [email protected] သို့ ဆက်သွယ်စုံစမ်းစာရင်းပေးသွင်းနိုင်ပါကြောင်း သတင်းရရှိသည်။